ᑐᑭᒧᐊᒃᑎᑦᑎᔨᐅᖃᑎᒋᔭᐅᔪᖅ ᓴᖃᓕᐊᓯ ᑯᓄᒃ ᑎᑎᕋᕐᑐᖅ ᐃᒪᓐᓇ, “ᓯᕗᓪᓕᕐᐸᖓᓂ ᐅᓪᓗᖓᓂ ᐊᐅᓪᓚᓚᐅᕐᑐᒍᑦ ᑕᒪᑦᑕ− ᑕᓪᓕᒪᐃᑦ ᐅᒥᐊᑦ ᑕᕙᖓᑦ ᕼᐊᒻ ᑲᖏᕐᖢᐊᓂ. ᑕ>ᑲᐅᑎᒋ ᐅᒥᐊᖅ ᐊᑐᕐᑕᕗᑦ ᐊᓯᐅᓂᐊᕐᑎᓪᓗᒍ, ᐊᐅᓚᐅᑎᕐᓗᓕᓚᐅᕐᑐᖅ. ᑭᓯᐊᓂ ᐅᓪᓄᓕᕐᑎᓪᓗᒍ ᓱᓪᓘᑰᓕᓚᐅᕐᑐᒍᑦ ᓯᑯᖃᐅᕐᖢᓂᓗ, ᑭᓯᐊᓂ ᑕᖕᒫᓚᐅᕐᑐᒍᑦ ᐅᓐᓄᖓᓂ ᓯᕗᓪᓕᕐᐸᖓᓂ ᖃᓂᒋᔭᖓᓂ ᐃᒃᓗᕋᓛᑉ ᕿᑭᕐᑕᒥ. ᖃᐅᒃᐸᖑᕐᒪᑦ ᒪᑐᕐᖢᓂ, ᑕᖕᒫᕐᓯᒪᐃᓐᓇᓕᓚᐅᕐᑐᒍᑦᒪ ᑕᒪᕐᒥᒃ ᑕᓪᓕᒪᐃᑦ ᐅᒥᐊᑦ. ᐱᖓᔪᖓᓐᓂ ᐅᓪᓗᖓᓂ ᐃᖏᕋᓯᒃᑲᓐᓂᓚᐅᕐᑐᒍᑦ. ᐅᓪᓛᑦᑎᐊᕙᐅᓪᓗᓂ, ᐊᐅᓚᐅᑎᕐᓗᐊᕿᓕᓚᐅᕐᑐᒍᑦ ᑭᓂᕐᑐᐊᕿᓕᕐᖢᓂᓗ. ᑲᓕᑕᐅᔭᕆᐊᖃᓚᐅᕐᑐᖓ ᐊᑭᐊᓄᑦ ᕿᑭᕐᑖᓗᑉ ᒥᒃᓴᓄᑦ ᑕᖕᒫᕐᓚᐅᕐᑐᒍᑦ. ᐱᑕ ᐊᕐᓇᑦᓯᐊᖅ ᐅᐸᒍᑎᓚᐅᕐᑐᖅ ᑕᖕᒫᕐᕕᒋᔭᑦᑎᓐᓄᑦ ᐅᑎᕐᖢᓂᓗ, ᑕᐃᑯᖓᕐᑐᐃᓐᓇᐅᓕᓚᐅᕐᑐᒍᑦ, ᑕᒪᕐᒥᒃ ᑕᓪᒪᐃᑦ ᐅᒥᐊᑦ ᑕᖕᒫᓚᐅᕐᑐᑦ. ᖃᐅᒃᐸᖑᕐᒪᑦ, ᑭᓂᑐᓕᓚᐅᕐᖢᓂ, ᐊᐅᓪᓚᒃᑲᓐᓂᓚᐅᕐᑐᒍᑦ, ᑭᓯᐊᓂ ᐊᐅᓚᐅᑎᕐᓗᐊᕿᓕᓚᐅᕐᒥᔪᒍᑦ, ᐱᑕ ᑲᓕᓕᓚᐅᕐᑖᖓ ᐅᒥᐊᕋ. ᒪᕈᒃ ᐅᒥᐊᒃ ᑕᐃᑯᖓᐅᖁᓚᐅᕐᑕᒃᑲ ᐅᐸᒐᓱᒃᑕᕐᓐᓄᑦ, ᑭᓯᐊᓂ ᖄᖏᓗᐊᓚᐅᕐᑑᒃ ᐅᐸᒐᓱᒃᑕᕐᑎᓐᓄᑦ ᑲᖏᕐᖢᒃᒧᖓᐅᓪᓗᑎᒃ. ᐱᖓᓱᑦ ᐅᒥᐊᑦ, ᐅᒥᐊᕋᓗ ᑲᓕᑕᐅᓪᓗᓂ, ᑎᑭᐅᑎᑕᐃᓇᓚᐅᕐᑐᒍ ᐅᐸᒐᓱᒃᑕᑦᑎᓐᓄᑦ, ᑭᓯᐊᓂ ᑕᐃᒃᑯᐊ ᒪᕈᒃ ᐅᒥᐊᒃ ᑕᕙᓃᓚᐅᖏᑦᑑᒃ. ᐅᖃᐅᑎᓪᓗᒍ ᔪᑕ ᐸᓪᓗᖅ ᑎᑭᖁᓪᓗᒍ ᑕᐃᒃᑯᐊᒃ ᒪᕈᒃ ᐅᒥᐊᒃ ᑎᑭᑉᐸᑎᒃ, ᑭᓯᐊᓂ ᑎᑭᓚᐅᖏᑦᑐᖅ. ᓯᒃᔭᒃᑰᕐᖢᑕ ᓯᑯᖃᖏᓐᓂᕐᓴᐅᖕᒪᑦ. ᖃᐅᒃᐸᖑᕐᒪᑦ ᑐᑭᓯᓕᓚᐅᕐᑐᒍᑦ ᑎᑭᓐᓇᓱᒃᑐᕕᓂᐅᒍᓗᐊᖅ ᐅᕙᑦᑎᓐᓄᑦ ᑭᓯᐊᓂ ᑕᑯᓚᐅᖏᑕᕗᑦ. ᑎᓴᒪᖓᓐᓂ ᐅᓪᓗᖓᓂ ᐃᖏᕋᓪᓗᑕ ᐅᖃᐅᑎᓚᐅᕐᑕᕋ ᐲᑕ ᐃᓗᐊᓂ ᑲᖏᕐᖣᒃᒧᖓᐅᖁᓪᓗᒍ ᕿᓂᕆᐊᕐᓗᓂᒋᒃ ᒪᕉᒃ ᐅᒥᐊᒃ. ᐅᑎᕋᒥ ᑐᑭᓯᓕᓚᐅᕐᑐᒍᑦ ᔫᑕ ᐅᑎᕋᓱᒃᑐᕕᓂᐅᓂᖓᓂᒃ ᐅᕙᑦᑎᓐᓄᑦ. ᓯᑯᖃᐅᓗᐊᓚᐅᕐᒪᑦ.”

ᑕᑯᒃᓴᐅᔪᖅ (90 ᒥᓂᑦ)

ᓴᖃᓕᐊᓯ ᑯᓄᒃ ᑕᕆᐅᔭᐅᓯᐅᕐᑎᓪᓗ, ᑕᕆᔭᐅᓯᐅᕐᑎᓗ ᒪᑎᓕᓐ ᐃᕙᓗ; ᓲᓴᓐ ᐊᕕᖓᖅ, ᑲᕈ ᑯᓄᒃ ᐊᒻᒪᓗ ᓘᓯ ᑐᓗᒑᕐᔪᒃ ᐃᖏᕋᓯᓚᐅᕐᑐᒍᑦ ᕿᑭᕐᑖᓗᖕᒧᑦ ᑕᖕᒫᕆᐊᕐᑐᕐᖢᑕ, ᐊᖑᓇᓱᒃᓗᑕ ᐊᒻᒪᓗ ᓂᐱᓕᐅᕐᓯᓗᑕ ᐊᐱᕐᓱᕐᑕᐅᔪᑦ ᐃᓐᓇᐃᑦ. ᐃᖏᕋᓂᕗᑦ ᐊᒃᓱᕈᕐᓇᕐᓯᓚᐅᕐᑐᖅ ᒪᓪᓕᓕᕐᖢᓂᓗ ᐊᐅᓚᐅᓪᓗᐊᕿᓪᓗᑕᓗ. ᐊᕕᓕᓚᐅᕐᑐᒍᑦ ᑕᖕᒫᕐᖢᑕ ᒪᕉᓕᓪᓗᑕ. ᐱᖃᑎᖏᓐᓂ, ᔫᑕ ᐸᓪᓗᖅ, ᐱᖁᔭᐅᖏᒃᑲᓗᐊᕐᖢᓂ ᐱᒪᒋᔭᖏᓐᓂᑦ, ᐊᐅᓚᓚᐅᕐᑐᖅ ᐃᓄᑑᓪᓗᓂ ᐃᑲᔪᕆᐊᕐᖢᓂ ᓱᕋᐅᔾᔨᔪᓂᒃ. ᐅᑎᕐᒪᑕ ᑲᑎᖓᓪᓗᑎᒃ ᖃᐅᒃᐸᖑᕐᑎᓪᓗᒍ, ᖃᐅᔨᓕᓚᐅᕐᑐᑦ ᔫᑕ ᐸᓪᓗᖅ ᐃᓚᐅᖏᓐᓂᖓᓂᒃ, ᑕᕙᓃᖃᑕᐅᖏᓐᓂᖓᓂᒃ.

ᑲᑎᒪᓕᓚᐅᕐᑐᑦ, ᐋᕿᒃᓯᓪᓗᑎᒃᓗ ᕿᓂᕐᑎᑦᑎᔪᒪᓪᓗᑎᒃ. ᔫᑕ ᓇᓂᔭᐅᖏᒃᑯᓂ ᐅᓪᓚᖑᕐᐸᑦ, ᕿᓂᕐᑎᓂᒃ ᐅᖃᐅᔾᔨᓂᐊᕐᖢᑎᒃ. ᖃᐅᒃᐸᖑᕐᒪᑦ ᓯᑯᓯᐅᑎᓕᕆᔨᒃᑯᑦ ᐅᖄᓚᕕᐅᓚᐅᕐᑐᑦ. ᖃᖓᑕᓲᕐ ᖁᓚᐅᓯᐅᕐᖢᓂ ᑕᕆᔭᐅᓯᐅᕐᑎᓪᓗᒋᑦ ᓄᓇᒥᑦ. ᐅᓚᖑᓚᐅᕐᖢᓂ ᐅᓐᓄᒃᑎᓪᓗᒍ ᑕᑯᔭᐅᓚᐅᓇᓂ ᔫᑕ, ᐅᐊᑦᑎᐊᕈᖑᕐᑎᓪᓗᒍ, ᓯᑯᓯᐅᑎᓕᕆᔨᒃᑯᑦ ᖁᓕᒥᒎᒥᒃ ᑎᑭᑎᑦᑎᓚᐅᕐᑐᑦ ᐅᖃᓪᓚᒋᐊᕐᑐᕐᖢᑎᒃ ᓴᖃᓕᐊᓯ ᑯᓄᒃᒥᒃ ᐊᒻᒪᓗ ᓘᓯ ᑐᓗᒑᕐᔪᒃ ᖃᓄᐃᓕᖓᓕᕐᒪᖔᑕ ᕿᓂᕐᓂᖏᑦ. ᑲᑎᒪᓕᓚᐅᕐᑐᑦ ᐃᓐᓇᐃᑦ ᑕᕆᔭᐅᓯᐅᕐᑎᓪᓗ. ᑎᐳᓚ ᖃᐅᓐᓇᖅ, ᔫᑕ ᐸᓪᓘᑉ ᓂᖏᐅᖓ, ᐅᖃᓚᐅᕐᑐᖅ ᑕᕆᔭᐅᓯᐅᕐᑎᓄᑦ ᐸᓯᖏᓐᓂᕋᕐᖢᓂᒋᑦ ᐃᖑᑕᖓ ᐊᓯᐅᓂᖓᓄᑦ ᐊᒻᒪᓗ ᑭᓇᑐᐃᓐᓇᕐᒥᒃ ᐃᓗᕆᖏᑦᑐᖃᕈᔨᓇᓂ. ᐊᓯᖏᑦ ᐃᓐᓇᐃᑦ ᐅᖃᓪᓚᑲᑕᓚᐅᕐᒥᔪᑦ ᐊᒻᒪᓗ ᐲᑕ ᐊᕙ ᑐᒃᓯᕐᑎᑦᑎᓚᐳᕐᑐᖅ ᔫᑕ ᐱᔾᔪᑎᒋᓪᓗᒍ. ᕿᓂᕐᐸᓪᓕᐊᑎᓪᓗᒋᑦ, ᓘᓯ ᐅᓂᒃᑳᓚᐅᕐᑐᖅ ᑕᕆᔭᐅᓯᐊᖑᓪᓗᓂ.

ᐃᓚᒍᑎᖓ 1

ᓴᖃᓕᐊᓯ ᑯᓄᒃ ᑕᕆᔭᐅᓯᐅᕐᑎᓪᓗ, ᑕᕆᔭᐅᓯᐅᕐᑎᐅᔪᓪᓗ ᒪᑎᓕᓐ ᐃᕙᓗ, ᓲᓴᓐ ᐊᕕᖓᖅ, ᑲᕈ ᑯᓄᒃ ᐊᒻᒪᓗ ᓘᓯ ᑐᓗᒐᕐᔪᒃ, ᐃᖏᕋᓯᓚᐅᕐᑐᑦ ᕿᑭᕐᑖᓗᖕᒧᑦ ᑕᖕᒫᕆᐊᕐᑐᕐᖢᑎᒃ, ᐊᖑᓇᓱᒃᓗᑎᒃ ᐊᐱᕐᓱᕐᓗᑎᒃᓗ ᐃᓐᓇᕐᓂᒃ. ᓯᑯᖃᐅᕋᓗᐊᕐᑎᓪᓗᒍ ᐊᐅᓚᐅᓪᓗᐊᕿᒐᓗᐊᕐᑎᓪᓗᒋᓪᓗ, ᑎᑭᑎᐅᑎᔪᓐᓴᓚᐅᕐᑐᑦ ᓴᕐᓕᐊᕈᓯᖅᒧᑦ ᑕᒃᓯᓕᓚᐅᖏᓐᓂᖓᓂ, ᐊᔪᕐᓯᐅᖃᓕᕐᖢᑎᒃᓗ. ᐃᓐᓇᐃᑦ ᐅᓂᒃᑳᖃᑦᑕᓚᐅᕐᑐᑦ ᐅᒥᐊᕐᒥᒃ ᐅᓯᖃᑦᑕᓚᐅᕐᓂᖏᓐᓂᒃ ᖃᒧᑎᒧᑦ, ᐊᒻᒪᓗ ᖃᓄᖅ ᐊᖑᓇᓱᒃᑎᑦ ᓱᓇᒐᓕᐅᕐᐸᓚᐅᕐᓯᒪᓂᖏᓐᓂᒃ ᑯᓯᕐᓯᐊᒃᓴᒥᒃ ᐋᕿᓕᕐᖢᒍ.

ᐃᓚᒍᑎᖓ 2

ᓯᓚᑦᑎᐊᕙᖑᕐᒪᑦ, ᑕᕆᔭᐅᓯᐅᕐᑎᑦ ᐸᕐᓇᓚᐅᕐᖢᑎᒃ ᐃᖏᕋᓯᓪᓗᑎᒃ ᕿᑭᕐᑖᓗᖕᒧᖓᐅᓕᓚᐅᕐᑐᑦ, ᐊᐅᓚᐅᓗᐊᕿᓪᓗᑎᒃᓗ ᓱᓕ, ᐊᕕᓕᓚᐅᕐᒥᔪᑦ. ᓇᓗᓕᐅᖃᓕᕐᖢᑎᒃᓗ ᑕᖕᒫᓕᓚᐅᕐᒥᔪᑦ ᐊᕕᒃᓯᒪᓪᓗᑎᒃ. ᐃᓚᖓᑦ ᐃᖃᓇᐃᔭᕐᑎ, ᔫᑕ ᐸᓪᓗᖅ, ᐃᑲᔪᕆᐊᓚᐅᕐᑐᖅ ᐊᐅᓚᐅᓪᓗᐊᕿᔪᓂᒃ, ᐃᓄᑑᓪᓗᓂ ᐊᐅᓚᓚᐅᕐᑐᖅ. ᑲᑎᒻᒪᑕ ᖃᐅᒃᐸᖑᕐᑎᓪᓗᒍ, ᑐᑭᓯᓇᕐᓯᓚᐅᕐᑐᖅ ᔫᑕ ᐃᓚᐅᖏᓐᓂᖓᓂᒃ. ᐊᓯᐅᖃᓕᕐᖢᓂᓗ. ᑲᑎᒪᓕᓚᐅᕐᑐᑦ, ᕿᓂᕐᑎᑦᑎᒋᐊᕈᒪᓕᕐᖢᑎᒃ, ᔫᑕ ᓇᓂᔭᐅᖏᒃᑯᓂ ᐅᓪᓛᖑᕐᐸᑦ, ᕿᓂᕐᑎᐅᔪᑦ ᐅᖃᐅᔾᔭᐅᓂᐊᕐᖢᑎᒃ.

ᐃᓚᒍᑎᖓ 3

ᔫᑕᐅᑉ ᓂᖏᐅᖓ, ᑎᐳᓚ ᖃᐅᓪᓐᓇᖅ, ᐊᒻᒪᓗ ᒪᑎᓕᓐ ᐃᕙᓗ ᐅᖃᓪᓚᖃᑦᑕᓚᐅᕐᑑᒃ ᐊᑐᖁᔭᐅᓚᐅᖏᑦᑐᒥᒃ “ᐅᐃᖑᐊᖃᕐᓂᕐᒥᒃ”. ᓯᑯᓯᐅᑎᓕᕆᔨᒃᑯᑦ ᕿᓂᓕᓚᕐᑐᑦ. ᐅᐊᑦᑎᐊᕈᖑᕐᑎᓪᓗᒍ ᓯᑯᓯᐅᑎᓕᕆᔨᒃᑯᑦ ᑎᑭᑎᑦᑎᓚᐅᕐᑐᑦ ᖁᓕᒥᒎᒥᒃ ᐅᖃᓪᓚᒃᕕᒋᔭᐅᔭᕐᑐᕐᖢᓂ ᓴᖃᓕᐊᓯ ᑯᓄᒃ ᐊᒻᒪᓗ ᓘᓯ ᑐᓗᒑᕐᔪᒃ ᖃᓄᐃᓕᖓᓕᕐᒪᖔᑕ ᕿᓂᕐᓂᐅᔪᖅ. ᑲᑎᒪᓕᓚᐅᕐᑐᑦ ᐃᓐᓇᐃᑦ ᐊᒻᒪᓗ ᑕᕆᐅᔭᐅᓯᐅᕐᑎᑦ. ᑎᐳᓛ ᖃᐅᓐᓇᖅ ᐅᖃᖢᓂ ᑭᓇᑐᐃᓐᓇᕐᒥᒃ ᐸᓯᒃᓯᖏᓐᓂᕋᕐᑐᖅ ᐊᓯᐅᓯᒪᓂᖓᓄᑦ ᐃᕐᖑᑕᖓ. ᐃᓐᓇᐃᑦ ᐅᖃᓪᓚᑲᑕᓚᐅᕐᑐᑦ ᐊᒻᒪᓗ ᐲᑕ ᐊᕙ ᑐᒃᓯᐊᕐᑎᑦᑎᓪᓗᓂ ᐊᓯᐅᓯᒪᔪᖅ ᐱᔾᔪᑎᒋᓪᓗᒍ. ᕿᓂᕐᑎᓪᓗᒋᑦ, ᓇᑲᑕᖃᑦᑕᓚᐅᕐᑐᑦ, ᐃᖃᓗᒐᓱᒃᖢᑎᒃᓗ ᐊᒻᒪᓗ ᐸᑦᑕᑲᑕᒃᖢᑎᒃ. ᓘᓯ ᑐᓗᒑᕐᔪᒃ ᐅᓂᒃᑳᓚᐅᕐᑐᖅ ᖃᓄᐃᓕᖓᕙᓪᓕᐊᓂᖏᓐᓂᒃ ᑕᕆᔭᐅᓯᐅᕐᑐᓄᑦ.

ᐃᓚᒍᑎᖓ 4

ᑕᕆᔭᐅᓯᐅᕐᑎᑦ ᐸᕐᓇᒃᑲᒥᒃ ᐅᑎᓚᐅᕐᑐᑦ ᐃᒡᓗᓕᖕᒧᑦ, ᓄᓇᕗᑦ, ᑎᑭᒃᑲᒥᒃ ᐃᒡᓗᓕᖕᒧᑦ ᕿᒃᓵᕐᑐᒧᐊᓚᐅᕐᑐᑦ. ᐃᒡᓗᓕᖕᒥ ᕿᓂᕐᑎᑦ ᑎᑎᕋᕐᕕᖓᓂ, ᓴᖃᓕᐊᓯ ᑯᓄᒃ ᐊᒻᒪᓗ ᓘᓯ ᑐᓗᒑᕐᔪᒃ ᐅᖃᐅᔾᔭᐅᓚᐅᕐᑑᒃ ᕿᓂᕐᓂᖏᓐᓂᒃ ᓯᑯᓯᐅᑎᓕᕆᔨᒃᑯᑦ ᐊᒻᒪᓗ ᕿᓂᕐᑎᑦ ᐃᒡᓗᓕᖕᒥᑦ. ᓴᖃᓕᐊᓯ ᑯᓄᒃ ᐅᓂᒃᑲᓚᐅᕐᑐᖅ ᐃᖃᐅᒪᔭᕐᒥᓂᒃ ᖃᓄᐃᑦᑐᖃᓚᐅᕐᓂᖓᓂᒃ. ᐅᐊᑦᑎᐊᕈᖑᕐᑎᓪᓗᒍ, ᓴᖃᓕᐊᓯ ᑯᓄᒃ ᑕᕆᔭᐅᓯᐅᕐᑎᓪᓗ, ᑕᐃᑯᖓᐅᔾᔭᐅᓚᐅᕐᑐᑦ ᔫᑕ ᐸᓪᓗᖅ ᐊᓯᐅᕕᒋᔭᖓᓄᑦ, ᑭᖑᓪᓕᕐᐹᒥᒃ ᕿᓂᕐᑕᐅᒃᑲᓐᓂᕆᐊᓕᕐᖢᓂ.