ᐃᑲᔪᖅᑐᖅᑕᐅᔪᒪᔪᑦ ᐃᓄᐃᑦ ᕿᔾᔭᓪᓗᒐᖃᕐᑎᖏᑦ

ᓴᖅᑭᔮᕐᑎᑎᖃᑕᖅᑎᓪᓗᒋᑦ ᐅᑭᐅᖅᑕᖅᑐᕐᒥᖔᖅᑐᓂᒃ, 

ᐅᕙᒍᑦ ᕿᔾᔭᓪᓗᒐᖓ ᑲᓇᑕᒥᐅᑕᐅᖃᑎᖏᓐᓄᑦ ᑕᑯᒃᓴᐅᑎᑦᑎᖃᑦᑕᖅᑐᑦ ᐃᓄᖕᓄᑦ ᐋᕿᒃᑕᐅᓯᒪᔪᓂ. ᑕᑯᔪᒥᓇᖅᑐᓂᒃ ᐅᑭᐅᖅᑕᖅᑐᒥᖓᖅᑐᑦ ᓴᖅᑭᔭᖅᑎᑕᐅᖃᑦᑕᖅᐳᑦ ᐊᔾᔨᓕᐅᖅᑕᐅᓯᒪᔪ, ᓲᕐᓗᓕ ᓇᓅᑉ ᒥᒃᓴᓄᖓᔪᑦ, ᓄᓇᒥᖔᕐᑐᓪᓗ, ᐃᓕᖅᑯᓯᖏᓐᓂᒃ ᐱᒃᑯᒋᔭᖃᑦᑎᐊᖅᖢᑎᒃ ᐊᕐᕌᒍᒐᓵᓗᖕᓂᒃ.

ᑕᕐᕆᔮᒃᓴᓂᒃ ᐅᓪᓛᒃᑯᑦ, ᐅᓪᓗᒃᑯᑦ, ᐅᓐᓄᐊᒃᑯᓪᓘᓂᓐ ᓴᖅᑭᔮᕐᑎᑎᕙᒃᖢᑎᒃ, ᓵᓚᒃᓴᓯᒪᔪᕕᓃᓪᓗ ᐱᓇᓱᐊᕈᓯᑕᒫᑦ ᓴᖅᑭᔮᖅᑎᑕᐅᓲᖑᒋᕗᑦ, ᐅᕙᒍᑦ ᕿᔾᔭᓪᓗᒐᖓᒍᑦ. ᓄᓇᕐᔪᐊᓕᒫᕐᒥ ᐃᓕᓴᕆᔭᐅᓯᒪᔪᑦ ᑕᕐᕆᔮᒃᓴᑦ ᓱᓕᔪᓕᐊᕆᓯᒪᔪᑦ, ᓄᑕᕋᕐᓄᑦ ᑐᕌᖓᔪᑦ, ᑲᑎᒪᓂᖅᑕᖃᑎᓪᓗᒋᓪᓘᓂ ᓴᖅᑭᔮᑎᑕᐅᓱᖑᖕᒥᔪᑦ, ᓄᓇᓕᖕᓂ ᐊᔪᖏᓐᓂᕆᔭᐅᔪᓪᓗ ᓴᖅᑭᔮᑲᐅᑎᒋᔪᓐᓇᖅᐸᒃᑭᓪᓗᑎᒃ. ᓴᖅᑭᔮᖅᐸᒃᑐᑦ 90%-ᖑᓪᓗᐊᖅᑐᒥᒃ ᐃᓄᒃᑎᑑᖅᐸᒃᑐᑦ, ᐃᓚᖏᓪᓗ 60%-ᖑᓪᓗᐊᖅᑐᒥᒃ ᖃᓪᓗᓈᑐᖅᑐᓂᒃ ᑎᑎᕋᖅᓯᒪᔪᖅᑕᖃᖅᐸᒃᑭᓪᓗᑎᒃ ᐊᑖᒍᑦ.

ᐃᓄᒃᑑᖅᑐᓂᒃ ᕿᔾᔭᓪᓗᒐᒃᑰᖅᑎᑎᕙᒃᑎᓪᓗᒋ ᑲᓇᑕᒥ, ᓯᕗᖕᒧᐊᒃᐸᓪᓕᐊᑦᑎᐊᖅᑐᑦ, ᐃᑲᔪᖅᑎᒌᖕᓂᕐᒥᒡᓗ ᑕᑯᒃᓴᐅᑎᑎᓪᓗᑎᒃ, ᐃᓕᓴᕆᔭᐅᔭᕆᐊᖃᖅᑐᖅ ᑕᒪᓐᓇ ᐱᒻᒪᕆᐅᓂᖓᓂᒃ.

ᑲᔪᓯᔪᓐᓇᑦᑎᐊᖁᓪᓗᑕ ᐃᑲᔪᖅᑕᐅᔪᒪᓕᖅᐳᒍ.

ᑐᒃᓯᕋᖅᓯᒪᓕᖅᑎᓪᓗᑕ ᑲᓇᑕᒥ ᓈᓚᐅᑎᖃᖅᑎᐅᔪᓄ, ᑕᕐᕆᔭᕈᓐᓇᐅᑎᖃᕐᑎᓄ, ᕿᔾᔭᓪᓗᒐᖃᖅᑎᓄᓪᓗ ᑲᑎᒪᔨᖏᓐᓄ (CRTC), ᑐᒃᓯᕋᕈᑎᒋᔭᕗᑦ “ᒪᓕᒐᖑᖅᑎᑕᐅᖁᔨᓂᖅ ᕿᔾᔭᓪᓗᒐᖃᖅᑐᓄᑦ ᐊᑕᖁᔨᓂᕐᒧᓐ” ᒪᓕᒐᕆᔭᐅᔪᖅ 9(1)(h), ᑐᓴᐅᒪᑎᑎᔨᒃᑯᓄᓐ, ᑕᒪᓐᓇ ᐊᖏᖅᑕᐅᓇᔭᖅᐸ ᑲᓇᑕᒥ ᕿᔾᔭᓪᓗᒐᖃᕐᑐᓗᒃᑖᑦ ᐅᕙᒍ ᕿᔾᔭᓪᓗᒐᖓᓐᓂ ᓴᖅᑭᔮᖅᑎᑦᑎᖃᑦᑕᕆᐊᖃᓕᕋᔭᖅᑐᑦ, ᐊᑭᓖᕋᕐᔪᒃᐸᓕᕐᓗᑎᒃ ᓴᖅᑭᔮᖅᑎᑦᑎᓂᖏᓐᓄ.

ᑐᒃᓯᕋᕈᑎᒋᔭᕗᑦ ᐊᖏᖅᑕᐅᒃᐸᑦ ᐅᕙᒍᑦ ᕿᔾᔭᓪᓗᒐᖓ ᑕᑯᒃᓴᐅᑎᑕᐅᖃᑦᑕᓕᕋᔭᖅᑐᖅ ᕿᔾᔭᓪᓗᒐᖃᖅᑐᓗᒃᑖᓄᑦ ᑲᓇᑕᒥ, ᐃᓄᒃᑑᖅᑐᓂᒃ ᑕᑯᒃᓴᐅᑎᑦᑎᕙᓕᕐᓗᑎᒃ. ᐃᑲᔪᖅᑐᐃᖁᔨᒐᓗᐊᖅᐳᒍᑦ ᐃᓕᓯᓐᓂ.

ᐃᓄᒃᑎᒍᑦ ᐃᓄᒃᑑᑐᓂᒃ ᑕᕐᕆᔭᕈᓐᓇᕆᐊᖃᕋᑦᑕ

ᑲᓇᑕᒥ ᑕᕐᕆᔭᕈᓐᓇᐅᑎᖏᑦᑎᒍ ᐅᓄᖏᓗᐊᖅᑐᓂᒃ ᓴᖅᑭᔮᖅᑎᑎᓲᖑᖕᒪᑕ ᐃᓄᐃᑦ ᒥᒃᓵᓄᖓᔪᓂᒃ, ᐃᓄᒃᑑᖅᑐᓂᒃ ᐱᓗᐊᖅᑐᒥᒃ. ᐅᕙᒍ ᕿᔾᔭᓪᓗᒐᖓ ᓴᖅᑭᔮᖅᑎᑎᔪᓐᓇᕋᔭᖅᑐ ᑭᓱᑐᐃᓐᓇᕐᓂ. 80%-ᓗᐊᕐᓂ ᑮᓇᐅᔭᓕᐊᕆᔭᐅᕙᓪᓕᐊᔪᑦ ᐃᓄᖕᓄ ᑐᕌᖓᔪᓐᓇᖅᓯᓇᔭᖅᑐ, ᓄᑖᕐᓂᒃ ᑕᕐᕆᔭᒐᒃᓴᓂᒃ ᓴᖅᑭᑎᑦᑎᔪᓐᓇᖅᓯᓇᔭᕋᑦᑕ

ᐃᓄᐃᑦ ᑐᓴᐅᒪᑎᑕᐅᑦᑎᐊᕆᐊᖃᕐᑐᑦ

ᐅᕙᒍ ᕿᔾᔭᓗᒐᖓ ᑐᓴᐅᒪᑎᑦᑎᑎᐊᕈᓐᓇᕋᔭᖅᑐᑦ ᐃᓄᖕᓂ ᐃᓄᒃᑑᖅᑐᓂᒃ. ᑐᓴᐅᒪᔭᐅᔭᕆᐊᓖᑦ ᐱᕙᓪᓕᐊᔪᑦ, ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᑎᑦᑎᑎᓪᓗᒋ, ᐃᒃᓯᕋᕐᔪᐊᕌᐱᒃ ᑎᑭᓯᒪᑎᓪᓗᒍ ᓴᖅᑭᔮᕐᑎᑎᓚᐅᐳᒍᑦ 2022-ᒥ, ᓱᓕᔪᓂᒡᓗ ᓯᕗᒻᒧᐊᒃᑎᑎᓇᓱᒃᑎᓪᓗᑕ ᐃᓅᖃᑎᒋᒃᑎᒍ. ᐃᑭᐊᖅᑭᕕᒃᑰᕐᐸᒃᑐ ᓱᒃᑲᐃᑦᑐᑯᓘᕙᒃᑎᓪᓗᒍ, ᐊᑭᑐᔪᐊᓘᔪᓐᓇᖅᑎᓪᓗᒍᓗ ᑖᓐᓇ ᕿᔾᔭᓪᓗᒐᖅ ᐊᑲᐅᓂᖃᑦᑎᐊᕈᓐᓇᖅᑐ ᐃᓄᖕᓄ.

ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓪᓗ ᐸᐸᓲᔭᒃᑲᓂᕈᓐᓇᖅᑕᕗ

ᐃᓚᖏᑦ ᐃᓄᐃᑦ ᐅᖃᐅᓯᖏᓐᓂᒃ ᐊᔪᓕᖅᐸᓪᓕᐊᑎᓪᓗᒋ, ᐅᕙᒍᑦ ᕿᔾᔭᓪᓗᒐᖓ ᐃᑲᔫᑎᖃᕈᓐᓇᕐᓂᐊᕐᒥᔪᖅ ᐃᓕᑦᑎᕚᓪᓕᒃᑲᓐᓂᕈᓐᓇᓂᐊᕐᒪᑕ ᑐᓵᕙᒃᑎᓪᓗᒋ ᐃᓄᒃᑑᖅᑐᓂᒃ, ᐱᒃᑯᓇᑦᑎᐊᖅᑐ ᑕᒪᓐᓇ ᐊᑑᑎᖃᑦᑎᐊᕈᓐᓇᕐᓂᐊᕐᒪ ᒪᓐᓇᒧᑦ, ᓯᕗᓂᒃᓴᑦᑎᓐᓄᓪᓗ .

ᐃᓄᐃᑦ ᐃᖅᑲᓇᐃᔮᒃᓴᖃᕈᓐᓇᕋᔭᖅᑐᑦ

ᐅᕙᒍᑦ ᕿᔾᔭᓪᓗᒐᖓ ᐃᑲᔪᖅᓱᐃᔪᓐᓇᓕᕋᔭᖅᑐᑦ ᑕᕐᕆᔮᒃᓴᓕᐅᖅᑎᓂᒃ, ᐃᓄᒃᑑᖅᑐᓂᒃ, ᐱᖅᑯᓯᑦᑎᓐᓂᓗ ᓴᖅᑭᑎᑦᑎᕙᓪᓕᐊᒃᑲᓂᕈᓐᓇᕋᔭᕋᑦᑕ. ᐅᓂᒃᑳᖅᑐᐊᖅᑏᑦ ᑕᐅᑐᒃᑕᐅᔪᓐᓇᕐᓗᑎᑦ ᐅᑭᐅᖅᑕᖅᑐᒥ, ᑲᓇᑕᒥᐅᑕᓂᒡᓗ.

ᓱᓕᔪᓂᒃ ᑐᓴᐅᒪᑎᑦᑎᓂᖅ, ᐃᑲᔪᖃᑎᒌᑦᑎᐊᕐᓂᕐᓗ

ᐅᕙᒍᑦ ᕿᔾᔭᓪᓗᒐᖓ ᐃᑲᔪᒐᔭᖅᑐᖅ ᑲᓇᑕᐅᑉ ᐱᓕᕆᐊᕆᔪᒪᔭᖓᓐᓂᒃ, ᓄᓇᕐᔪᐊᓕᒫᕐᓗ ᑲᑎᒪᔨᖅᔪᐊᖏᑦ ᐱᔪᒪᔭᖓᓐᓂᒡᓗ, ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐊᑐᕐᕈᓐᓇᕆᐊᖃᕐᓂᖏᓐᓂᒃ ᒪᓕᒐᓕᐊᕆᔭᐅᓯᒪᔪᒥᒃ. ᑲᓇᑕᒥᐅᑕᐅᖃᑎᕗᑦ ᑐᓴᐅᒪᓂᖅᓴᐅᔪᓐᓇᓕᕋᔭᖅᑐᑦ ᐃᓄᐃᑦ ᐃᓕᖅᑯᓯᖏᑦᑕ ᒥᒃᓵᓄ. ᑕᕐᕆᔭᖅᑕᐅᔪᑦ ᖃᓪᓗᓈᑎᑑᖅᑐᓂ, ᐅᐃᕖᑐᖅᑐᓂᒡᓗ ᑎᑎᕋᖅᓯᒪᔪᓂᒃ ᐊᑖᓂᑦᑐᖃᖃᑦᑕᕈᓇᕋᔭᕆᓪᓗᓂᓗ.

ᐅᕙᒍᑦ ᕿᔾᔭᓪᓗᒐᖓᑦᑕ ᒥᒃᓴᓄᑦ

ᐅᕙᒍᑦ ᕿᔾᔭᓪᓗᒐᖓ ᓴᖅᑭᒋᐅᓚᐅᖅᓯᒪᔪᖅ ᔮᓄᐊᕆ 18, 2021-ᖑᑎᓪᓗᒍ, ᓯᕗᓪᓕᖅᐹᑎᐊᖑᓪᓗᓂ ᐃᓄᒃᑎᑑᖅᑐᓂᒃ ᑕᕐᕆᔭᖅᑎᑎᖃᑦᑕᓕᖅᖢᑎᒃ ᖃᐅᑕᒫᑦ, ᓄᑕᕋᕐᓄ ᑐᕌᖓᔪᓂᒃ, ᑕᕐᕆᔭᒐᒃᓴᓂᒃ, ᓱᓕᔪᓕᐊᕆᓯᒪᔪᓂᒃ, ᐃᓕᖅᑯᓯᖏᓐᓂ ᐊᑐᖅᖢᑎᒃ ᓴᖅᑭᔮᖅᑎᑎᕙᒃᑐᑦ, ᑐᓴᐅᒪᔭᐅᔭᕆᐊᓖ ᓴᖅᑭᔮᖅᑎᑕᐅᕙᒃᖢᑎᒃ.

ᐅᕙᒍᑦ ᕿᔾᔭᓪᓗᒑᒍᑦ ᐃᓅᖃᑎᒌᑦ ᑐᓴᐅᒪᖃᑦᑕᐅᑎᔪᓐᓇᓲᖑᔪᑦ, ᓄᑕᕋᑯᓗᐃᓪᓗ ᐅᖃᐅᓯᖏᓐᓂ ᑐᓵᓗᑎᒃ ᑕᕐᕆᔭᕈᓐᓇᓕᖅᖢᑎᒃ. ᓄᓇᐅᑉ ᒥᒃᓵᓄᖓᔪᓂᒃ ᑐᓴᐅᒪᑎᑦᑎᕙᒃᑐᑦ, ᐃᓅᓯᖏᑦᑕ ᒥᒃᓵᓄᑦ, ᐃᓕᖅᑯᓯᖏᓐᓂᓗ, ᓄᓇᖓᓐᓂᖔᖅᑐᓂᒃ ᑲᓇᑕᒥᐅᑕᐅᖃᑎᖏᓐᓂᓗ.

“ᐅᕙᓐᓄᓪᓕ ᐅᕙᒍᑦ ᕿᔾᔭᓪᓗᒐᖓ ᐊᑲᐅᓂᖃᑦᑎᐊᖅᑐᖅ, ᓂᕕᐊᖅᓵᖑᑎᓪᓗᖓ ᐱᔪᒪᔭᖃᓚᐅᖅᓯᒪᒐᒪ ᐃᓕᖅᑯᓯᑦᑎᓐᓂᒃ, ᐃᓄᒃᑑᑐᓂᓪᓗ ᑕᕐᕆᔭᕈᓐᓇᖃᑦᑕᕈᒪᓪᓗᖓ. ᐃᓐᓇᖅᐳ ᐃᓅᓂᖏᓐᓂ ᐃᓕᖅᑯᓯᖅᐳᑦ, ᐱᖅᑯᓯᖅᐳᓪᓗ ᓂᐱᓕᐅᖅᐸᓪᓕᐊᔭᕆᐊᖃᖅᑕᕗ, ᕿᑐᕐᖓᕗ, ᐃᕐᖑᑕᑯᓗᒃᐳᓪᓗ ᐱᔪᓐᓇᕐᓂᖃᖁᓪᓗᒋ. ᑭᖑᕚᒃᓴᕆᓂᐊᖅᑕᕗᑦ ᐱᕕᖃᕆᐊᖃᕐᒥᖕᒪᑕᑦᑕᐅᖅ”.
ᓘᓯ ᑐᓗᒐᕐᔪᑦ, ᐅᕙᒍᑦ ᕿᔾᔭᓪᓗᒐᖓᑦᑕ ᐊᖓᔪᖅᑳᖓᓐ