ᐃᓱᒪᒃᑯᑦ
ᑭᖑᓪᓖᑦ ᐅᖄᕗᖅ ᐃᓄᓐᓂᒃ ᐃᓅᓕᓚᐅᕐᓯᒪᔪᓂᒃ 1900-ᐄᑦ ᐊᕐᕌᒍᕐᖄᕕᓂᖏᓐᓂ 30-ᓂ. ᐊᑦᓯᔭᐅᒪᔪᕕᓃᑦ `ᑭᖑᕚᖑᓕᕐᑐᑦ` ᓯᕗᓪᓕᐹᐅᓐᓂᕋᒥᒃ ᐊᕐᕌᒍᒐᓴᕐᔪᐊᓂ ᓵᑦᓯᓱᑎᒃ ᐊᑦᔨᐅᖏᑦᑐᒥᒃ ᓄᓇᕐᔪᐊᖑᒻᒥᔪᒥᒃ ᐊᓯᑦᔨᓚᐅᕐᓯᒪᓐᖏᑑᑉ ᖃᐅᔨᒻᒫᕆᔭᐅᑦᓱᓂᓗ ᓴᓂᐊᓐᓂᑦ ᑲᒪᒋᔭᐅᓕᓂᒻᒪᕆᐅᑦᓱᓂ ᐊᒥᓱᒐᓴᕐᔪᐊᓄᑦ ᑭᒍᕚᕇᕐᑎᑐᓄᑦ ᑌᑦᓱᒪᓐᖓᓂᐊᓗᒃ. ᑭᖑᓪᓖᑦ ᑐᑭᓕᒃ ᐊᑯᓂᓂᑕᒻᒪᕆᓐᓂᑦ ᐅᓪᓗᒥᐅᓕᕐᑐᒧᑦ - ᐅᔭᕋᕐᓂᒃ ᓴᓇᕐᕈᑎᖃᓲᒍᐃᓐᓈᑐᓂᑦ ᖃᕆᑕᐅᔭᓕᕆᓕᕐᑐᓄᑦ - ᐊᑕᐅᓯᕐᒥ ᐃᓅᓯᕐᒥ : ᐱᒋᐊᕐᕕᕕᓂᐅᑎᓪᓗᒋᒃ ᑲᔦᔅᑑᓯᒥᐅᑕᐅᓂᖅ ᓂᐅᕐᕈᓯᕐᓂᓗ, ᑭᖑᓯᑎᓪᓗᒋᑦ ᑲᕙᒣᑦ, ᐳᓖᓰᑦ, ᓄᓇᓖᑦ, ᑮᓇᐅᔦᑦ, ᐃᓕᓐᓂᐊᓃᑦ, ᑐᓴᕈᑎᓕᕆᓃᑦ, ᖃᕆᑕᐅᔦᑦ ᐊᒻᒪᓗ ᑭᖑᓪᓕᐹᖅ , 2.0-ᒥ ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒧᑦ ᐱᑐᑦᓯᒪᖃᑦᑕᐅᑎᓂᖅ.
ᑐᑦᑐᔭᖅ
ᑐᕌᕐᓂᕆᒐᓱᐊᕐᑕᕋ ᑖᑦᓱᒧᖓ ᑕᕐᕋᓕᔮᓕᐊᕋᓄᑦ ᑕᑯᑎᑦᓯᓯᐊᕈᒪᒐᒪ ᖃᓄᖅ ᑐᑦᑐᐃᑦ ᐱᒻᒪᕆᑦᔪᐊᕌᓗᒻᒥᒃ ᓄᓇᖃᓲᒍᓐᓂᒪᖔᑕ ᐃᓄᐃᑦ ᓄᓇᕕᐅᑉ ᑕᕐᕋᖓᓂᒥᐅᑦ ᐃᓅᒡᒍᓯᑐᖃᕆᓚᐅᔪᔭᖓᓂ ᓄᓇᕕᓕᒫᑦᓯᐊᒥᒐᓚᒃ ᑐᑦᑐᐃᑦ ᐊᓯᐅᓚᐅᕐᑎᓇᒋᑦ ᑐᖓᓕᐊᓂᒃ ᓯᓚᕐᔪᐊᒥ ᐅᓇᑕᕐᓂᔪᐊᖃᕐᑎᓗᒍ, ᐃᒻᒪᖄᓪᓘᓃᑦ ᐊᖃᒍᐊᓂ. ᑐᑦᑐᐃᑦ ᐊᓯᐅᓪᓚᕆᐊᓗᑦᓴᒪᑕ ᐃᓄᓐᓄᑦ ᐱᔭᐅᑦᓴᕌᕐᐸᓕᕐᑐᕕᓃᑦ ᐅᖓᓯᑦᑐᐊᓗᒻᒧᑦ ᒪᙯᒋᐊᕐᑎᓗᒋᑦ ᓇᐹᕐᑐᐃᑦ ᒥᑦᓵᓄᑦ ᑖᕙᓃᓐᓂᒥᒪᑕ ᐊᖏᓂᕐᓭᑦ ᓇᐹᕐᑐᓕᒻᒥᐅᓴᔭᐅᑦᓱᑎᒃ ᑐᑦᑐᐃᑦ ᑖᕙᒃᑯᐊᓗ ᑐᑦᑐᐃᑦ ᓅᑦᑐᕕᓂᐅᑦᓱᑎᒃ ᓄᓇᕕᒻᒧᑦ ᓇᐹᕐᑐᐃᑦ ᒥᑦᓵᖓᓄᑦ.
ᒥᑎᒐᖅ
ᐱᐅᓯᐅᔪᕕᓃᑦ ᐅᓇᑕᕐᑐᕕᓂᐅᑎᓪᓗᒋᑦ ᖃᓪᓗᓈᑦ, ᐊᓪᓓᑦ ᐃᓄᐃᓪᓗ, ᐃᓄᐃᑦ ᐃᓚᒌᑦᑐᑦ ᓄᓇᑐᐃᓐᓇᒥᒃ ᕿᒣᔪᕕᓃᑦ ᐊᓐᓇᒋᐊᕐᓱᑎᒃ ᕿᑭᕐᑕᓄᑦ ᐃᓚᐅᑎᓪᓗᒍ ᓴᓂᑭᓗᐊᖅ. ᑖᕙᒃᑯᓇᓂ ᕿᑭᕐᑕᓂ ᑐᑦᑐᖃᕐᓂᔭᖏᑦᑐᖅ ᑭᓯᐊᓂ ᒥᑎᓕᒻᒪᕆᐅᑦᓱᓂ. ᑌᒣᒻᒪᑦ ᐃᓄᐃᑦ ᒥᑎᒐᕐᓂᒃ ᐊᓐᓄᕌᓕᐅᕐᐸᓕᕐᑐᕕᓃᑦ ᒥᑎᒐᑐᐊᓂᒃ ᐊᓐᓄᕌᕐᓯᒪᓲᒍᓕᕐᓱᑎᒃ. ᕿᑭᕐᑕᒥᐅᑦ ᐊᔪᒉᑦᑑᓂᖏᑦ ᐊᑦᔨᐅᖏᑦᑑᒍᑎᓕᕕᓃᑦ ᓄᓇᑐᐃᓐᓇᒥᐅᓂᑦ ᑐᑦᑐᔭᓂᒃ ᐊᓐᓄᕌᕐᓯᒪᓲᒍᓐᓂᒪᑕᓕ. ᑖᓐᓇ ᑕᑯᓐᓇᕋᑦᓴᖅ ᑕᑯᑎᑦᓯᔪᖅ ᑎᑭᒐᕐᓂᒃ ᐊᓐᓄᕌᓕᐅᕐᓂᓂᒃ.
ᐃᖃᓪᓕᔪᖅ
ᕉᔅ ᐃᖃᓪᓕᔪᖅ ᐅᓂᒃᑳᑐᖅ ᐊᐅᓚᔨᔭᕐᒥᓂᒃ ᐃᓪᓕᐊᑉ ᐃᓗᐊᓃᑦᓱᓂ, ᐊᖃᒍᐊᒍᓪᓗ, ᐊᑖᑕᑦᓯᐊᕆᓕᕐᓱᓂᐅᒃ ᓴᕝᕕᐅᕐᑕᓕᐅᑦᓱᓂ ᐃᓗᕕᕐᒥᓃᑦᓱᓂ ᓴᕕᐅᔭᕐᑕᕕᓂᕐᓂ. ᑌᑰᓇᓪᓗᐊᖅ ᐃᓅᓕᕆᐊᓪᓚᒍᒪᓕᕐᑐᕕᓂᖅ ᐸᓂᒃᑯᒥᓂᒥᐅᒍᓗᓂ. ᐃᖃᓪᓕᔪᖅ/ᓴᕝᕕᐅᕐᑕᓕᒃ ᐅᓂᒃᑳᑐᖅ ᑕᕐᓂᒍᓗᑐᐃᓐᓇᐅᓂᕕᓂᕐᒥᓂᒃ ᑕᐅᑦᑐᖃᕐᓱᓂ ᐃᑦᑐᒻᒪᕆᒻᒥᒃ, ᐃᓗᕕᕐᒥᓂᑦ ᐊᓂᔪᕕᓂᐅᓂᕋᕐᓱᓂ ᐱᓱᓯᑦᓱᓂᓗ ᐃᒡᓗᒧᑦ ᐸᓂᖓᑕ ᓄᕝᕕᔭᐅᑉ ᐃᓚᖏᑦᑕᓗ ᐊᓂᕐᕋᖓᓄᑦ. ᑕᕝᕙᓂ ᑕᑯᓐᓇᕋᑦᓴᒥ ᐃᖃᓪᓕᔪᖅ ᐅᖄᔪᖅ ᐊᐅᓚᔨᔭᓕᒫᒥᓂᒃ ᐃᓅᓕᕐᓱᓂ, ᐱᕈᕐᓴᓱᓂ ᐊᖑᑎᓯᐅᑎᓂᓗ ᐊᓐᓄᕌᕐᓯᒪᓲᒍᑦᓱᓂ ᐊᕐᓇᓯᐅᑎᓂᒃ ᐊᓐᓄᕌᒋᐅᑐᐃᓐᓇᕋᑕᕐᓱᓂ.
ᖁᐊᕐᑕᖅ
1956-ᒥ ᑕᑯᓐᓇᕋᑦᓴᓕᐊᕕᓂᐅᑦᓱᓂ, ᑖᓐᓇ ᐅᓂᒃᑳᑕᐅᔪᖅ ᑕᑯᑎᑦᓯᔪᖅ ᐃᓄᐃᑦ ᐃᓅᒍᓯᖏᓐᓂᒃ ᐅᑭᐅᒥ ᖁᐊᕐᑕᒥ, ᐃᒡᓗᖏᑦ ᐊᖏᔪᕐᓚᒪᕆᐅᑎᓗᒋᑦ ᐃᓚᒌᑦᑐᑦ ᐊᒥᓱᐃᒍᒻᒪᑕ. ᐃᓅᓯᖏᑦ ᐱᐅᓯᑐᖃᕐᑎᒎᕐᓱᑎᒃ ᐱᓇᓱᐊᓲᒍᓐᓂᒪᑕ ᒪᙯᑦᓱᑎᒃ, ᐊᕐᓀᑦ ᓄᓂᕙᑦᑎᓗᒋᑦ, ᐃᓅᖃᑎᒌᑦᑎᓗᒋᑦ, ᐃᒡᓗᓕᑎᓪᓗᒋᑦ, ᐱᐊᕃᑦ ᐱᓐᖑᐊᓗᑳᑦᑎᓗᒋᑦ … ᑖᓐᓇ ᐅᓂᒃᑳᑕᐅᑦᓱᓂ ᑕᑯᓐᓇᕋᑦᓴᖅ ᑕᑯᑎᑦᓯᒥᔪᖅ ᐃᒡᓘᑉ ᐃᓗᐊᓃᑦᓱᑎᒃ ᑕᑯᓐᓇᕋᑦᓴᓕᐅᕐᑕᐅᔪᓂᒃ, ᐃᒡᓘᐃᑦ ᐃᓗᖏᑦ ᑕᑯᑦᓴᐅᑎᓪᓗᒋᑦ, ᓂᓚᒥᒃ ᐃᒐᓛᖃᕐᓱᑎᒃ, ᐊᖏᔪᑲᓪᓚᒥᒃ ᖁᓪᓕᖃᕐᓱᑎᒃ, ᐊᓯᖏᓐᓂᓗ.
ᑲᖏᕐᓱᔪᐊᖅ
ᑖᓐᓇ 40-ᒥᓂᑦᔅ-ᑐᕐᑐᖅ ᑕᑯᓐᓇᕋᑦᓴᓕᐊᕕᓂᖅ ᐱᓯᒪᑦᓱᓂ ᓯᑕᒪᐅᓕᕿᖓᔪᓂᑦ ᐅᓂᒃᑳᓱᒋᑦ ᑕᑯᓐᓇᕋᑦᓴᓕᐊᕕᓂᖏᓐᓂᑦ ᐱᕐᓈᑉ 1961-ᒥ ᐊᒻᒪᓗ 1965-66-ᒥ. ᐊᕕᑦᑐᑕᐅᑦᓱᓂ ᐊᒥᓱᐃᒐᓛᓄᑦ ᐱᓂᐊᕐᓂᓄᑦ, ᐅᕙᑦᑎᓂᒃ ᑕᑯᑎᑦᓯᓯᐊᕐᑐᖅ ᑌᑦᓱᒪᓂ ᐊᐅᓚᒍᓯᐅᕙᑦᑐᕕᓂᕐᓂᒃ ᐆᑦᑑᑎᒋᓗᒋᑦ ᕿᒧᑦᓯᓂᕐᓂᒃ, ᕿᒻᒥᓂᒃ ᑕᓯᒍᐊᕐᓂᓂᒃ ᖃᔭᕐᑐᓂᕐᓂᒃ ; ᕿᓚᓗᒐᕐᓯᐅᑐᓂᒃ, ᖃᔭᕐᒥᒃ ᐊᒥᐊᕆᔪᓂᒃ ᐅᑦᔪᔭᕕᓂᕐᓄᑦ,ᖃᔭᓕᐅᓕᕋᒥᓪᓗ ᐊᒥᓲᒋᐊᖃᓲᕕᓂᐅᑦᓱᑎᒃ ᓄᓇᓯᒪᔪᑦ ; ᑑᓪᓕᔭᖅ ᒥᕐᖁᑎᖃᐅᑎᓐᖑᑕᐅᑎᓗᒍ, ᕿᒻᒦᑦ ᐱᒻᒪᕆᐅᓂᕕᓂᖏᓐᓂᒃ ᓄᓇᓕᒻᒥᐅᑎᒍᑦ ; ᐱᐊᕃᑦ ᐱᓐᖑᐊᕈᓯᖏᓐᓂᒃ ; ᐅᕕᓗᕐᑕᓂᕐᓂᒃ/ᖁᓪᓗᓂᕐᑕᓂᕐᓂᒃ ᑎᓂᓐᖓᓕᕐᒪᑦ ; ᓄᓂᕙᓐᓂᓂᒃ ; ᑭᓯᐊᓂᓗᑦᑕᐅᖅ ᑲᕙᒣᑦ ᐊᖓᔪᕐᖃᐅᓯᕐᐸᓕᐊᓯᓂᕕᓂᖏᓐᓂᒃ ᑎᑭᑉᐸᓕᑐᐊᕋᒥᒃ ᐊᕐᕌᒍᑕᒫᑦ ᓯᑯᓯᐅᑎᑎᒍᑦ ᐊᓯᖏᑎᒍᓪᓗ, ᐃᓄᐃᑦ ᑲᑎᐅᕐᖃᑐᐊᓘᓕᕐᑎᓗᒋᑦ ᓄᓇᓕᓐᓄᑦ.
ᖃᕐᒪᖅ
ᖃᕐᒪᐅᑉ ᑐᓐᖓᕕᖓ : ᐊᑭᓐᓇᖏᑦ ᓄᓇᔭᕐᑕᖃᕐᓱᑎᒃ ᓯᕐᒦᑦ ᓇᑲᑎᕐᑕᕕᓂᐅᑦᓱᑎᒃ ᑲᓂᕐᔪᓕᑌᓐᓇᑐᕕᓂᐅᑎᓗᒍ. ᓯᒃᑭᑕᐅᑉ ᖁᓛᖓ ᖁᐊᕐᓯᒪᑦᓯᐊᑐᖅ, ᐊᓕᕐᓯᓕ ᖃᐅᓯᐅᒻᒪᑦ ᓇᑎᕐᒧᑦ ᓂᐱᓂᐊᕋᒥ ᐅᕝᕙᓘᓐᓃᑦ ᑐᓐᖓᕕᖓᓅᓂᐊᕋᑦᑎᒍ.
ᑐᐱᓕᐊᕐᓂᖅ
ᑕᑯᓐᓇᕋᑦᓴᖅ ᑕᑯᑎᑦᓯᔪᖅ ᕿᓯᔦᓐᓇᒥᒃ ᑐᐱᑦᓴᓕᐅᕐᑐᓂᒃ ᖃᓄᕐᓗ ᕿᓯᒃ ᕿᑦᓯᕆᔭᐅᓐᓂᒪᖔᑦ ᑐᐱᓕᐊᒍᓚᖓᑐᐊᕈᓂ.
