Skip to Content (Press Enter)

ᐃᖃᓪᓕᔪᖅ

About

ᕉᔅ ᐃᖃᓪᓕᔪᖅ ᐅᓂᒃᑳᑐᖅ ᐊᐅᓚᔨᔭᕐᒥᓂᒃ ᐃᓪᓕᐊᑉ ᐃᓗᐊᓃᑦᓱᓂ, ᐊᖃᒍᐊᒍᓪᓗ, ᐊᑖᑕᑦᓯᐊᕆᓕᕐᓱᓂᐅᒃ ᓴᕝᕕᐅᕐᑕᓕᐅᑦᓱᓂ ᐃᓗᕕᕐᒥᓃᑦᓱᓂ ᓴᕕᐅᔭᕐᑕᕕᓂᕐᓂ. ᑌᑰᓇᓪᓗᐊᖅ ᐃᓅᓕᕆᐊᓪᓚᒍᒪᓕᕐᑐᕕᓂᖅ ᐸᓂᒃᑯᒥᓂᒥᐅᒍᓗᓂ. ᐃᖃᓪᓕᔪᖅ/ᓴᕝᕕᐅᕐᑕᓕᒃ ᐅᓂᒃᑳᑐᖅ ᑕᕐᓂᒍᓗᑐᐃᓐᓇᐅᓂᕕᓂᕐᒥᓂᒃ ᑕᐅᑦᑐᖃᕐᓱᓂ ᐃᑦᑐᒻᒪᕆᒻᒥᒃ, ᐃᓗᕕᕐᒥᓂᑦ ᐊᓂᔪᕕᓂᐅᓂᕋᕐᓱᓂ ᐱᓱᓯᑦᓱᓂᓗ ᐃᒡᓗᒧᑦ ᐸᓂᖓᑕ ᓄᕝᕕᔭᐅᑉ ᐃᓚᖏᑦᑕᓗ ᐊᓂᕐᕋᖓᓄᑦ. ᑕᕝᕙᓂ ᑕᑯᓐᓇᕋᑦᓴᒥ ᐃᖃᓪᓕᔪᖅ ᐅᖄᔪᖅ ᐊᐅᓚᔨᔭᓕᒫᒥᓂᒃ ᐃᓅᓕᕐᓱᓂ, ᐱᕈᕐᓴᓱᓂ ᐊᖑᑎᓯᐅᑎᓂᓗ ᐊᓐᓄᕌᕐᓯᒪᓲᒍᑦᓱᓂ ᐊᕐᓇᓯᐅᑎᓂᒃ ᐊᓐᓄᕌᒋᐅᑐᐃᓐᓇᕋᑕᕐᓱᓂ.

ᐃᖃᓪᓕᔪᖅ (1973)

ᐊᐅᓚᔨᔭᕕᓃᑦ ᐃᓄᒻᒧᑦ ᐊᑎᖃᕐᓱᓂ-ᑕᕐᓂᒥᒃ; ᐃᖃᓪᓕᔪᖅ ᐃᓄᒃᑎᑑᕐᓱᓂ ᐅᓂᒃᑳᑐᖅ ᐃᒡᓕᐊᒦᑦᓱᓂ ᐊᐅᓚᔨᔭᕕᓂᕐᒥᓂᒃ.

16mm ᑕᑯᓐᓇᕋᑦᓴᖅ ᑕᐅᑦᑐᓕᒃ ᐃᓄᒃᑎᑑᕐᑐᖃᕐᑎᓗᒍ

13-ᒥᓂᑦᔅ-ᑐᕐᑐᖅ

ᑐᑭᒧᐊᕐᑎᓯᔪᕕᓂᖅ : ᐱᕐᓈ ᓴᓚᑏᓐ ᑕᖕᒃᓘᕐ

ᐊᐱᕐᓱᑐᕕᓂᖅ: ᐊᓕᐊᒃᓯᓇ ᑯᑉᓗ

ᐊᑦᔨᓕᐅᕆᔪᕕᓂᖅ ᓂᐱᖃᕐᑎᓯᑦᓱᓂᓗ: Philippe Legrand ᓛᕙᓪ ᐃᓕᓐᓂᐊᕕᕐᔪᐊᖓᑕ ᓂᐱᓕᓐᓂᒃ ᑕᑯᓐᓇᕋᑦᓴᓕᐅᕐᕕᖓᓂ
ᑕᑯᓐᓇᕋᑦᓴᓕᐊᕕᓂᖅ ᐃᒡᓗᓕᒃ, ᓄᓇᕗᑦᒥ, 1973 ᐅᐱᕐᖔᖓᓂ
ᐃᓂᓪᓓᔪᕕᓂᖅ ᐃᑲᔪᕐᓯᒪᑎᓪᓗᒍ ᐃᓄᒃᓯᐅᑏᑦ ᐃᑲᔪᖃᑎᒌᓐᓂᖓ ᐊᒻᒪᓗ ᓛᕙᓪ ᐃᓕᓐᓂᐊᕕᕐᔪᐊᖓᑕ ᓂᐱᓕᓐᓂᒃ ᑕᑯᓐᓇᕋᑦᓴᓕᐅᕐᕕᖓᓂ 

ᐊᓪᓚᖑᐊᕐᑐᕕᓂᖅ : ᓕᐊ ᐃᓪᓚᐅᑦ d’Argencourt ᐃᖃᓪᓕᔪᖅ ᓇᓗᓀᕐᓯᔪᕕᓂᐅᑎᓪᓗᒍ.

ᓱᓇᒥᑦᓯᐊᑎᓗᒍ ᓯᑯᑦᓴᔭᒨᕐᑕᕕᓂᖅ

00:00:20

ᐃᖃᓪᓕᔪᖅ - ᑌᒪ ᓯᙰᒍᓂᐊᖅᑐᖓ ᖃᐅᔨᓚᐅᖅᓯᒪᕗᖓ ᐃᓗᕕᕐᒦᑐᖓ ᓂᒡᓚᓱᒃᑐᐊᓗᖕᒥ ᑕᕝᕙ ᐅᑯᐊ ᐊᐅᕖᑦ ᐃᓕᓯᒪᖕᒪᑕ ᐅᕘᓇ ᐃᓱᒃᑎᖅᐹᖅ ᐅᓇ ᒪᒃᐱᖅᑐᒍ ᐊᓂᒐᒪ ᕿᓂᓕᕋᒪ ᑕᑲᓐᓇ ᓇᔭᓐᓈᕋ

00:00:45

ᑯᑉᓗ - ᑭᓱ ᐊᐅᕖᑦ ᒪᒃᐱᖅᑐᒍ?

00:00:50

ᐃᖃᓪᓕᔪᖅ - ᐃᒫᒃ ᐅᕘᓇ ᐊᔭᒃᑐᒍ ᐊᐅᕖᑦ ᒪᑯᐊ ᐃᓕᐅᖅᑲᖅᓯᒪᓲᑦ ᐊᐅᕕᕐᓂᒃ ᖃᐅᔨᒪᕖᑦ.

00:01:01

ᐃᖃᓪᓕᔪᖅ - ᐄᐃ. ᐊᐳᑦ ᐊᔭᒃᑐᒍ ᐹᓕ ᐹᖑᓕᕐᒪᑦ ᑕᕝᕘᓇ ᐊᓂᒐᒪ ᑕᑲᓐᓇ ᑕᑯᒐᒃᑭᑦ ᓇᔭᓐᓈᑯᒃᑲ ᐊᓈᓇᒃᑯᒃᑲ ᐊᓈᓇᒐ ᐃᒥᕈᒃᑐᐊᓘᒐᒪ ᑕᑲᓄᓐᖓᐅᓕᖅᑐᖓ ᐃᒫᒃ ᐊᖑᑕᐅᓪᓗᖓ ᕿᖅᐸᐅᔭᖃᖅᑐᖓ ᓯᓚᐹᖃᖅᑐᖓ ᒥᖅᑯᓕᖃᖅᑐᖓ ᐃᓅᖅᑰᔨᑦᑎᐊᖅᑐᖓ ᑕᑲᓄᓐᖓᐅᓪᓗᖓ ᑕᕝᕙ ᓴᓂᑦᑎᐊᖓᓄᐊᕋᒪ ᐃᒥᕈᒪᓪᓗᖓ ᐅᖃᕋᓗᐊᕋᒪ ᑐᓴᓐᖏᒻᒪᑦ ᐃᒥᕆᐊᖅᑐᕐᓂᕋᖅᑐᖓ.

00:01:35

ᑯᑉᓗ - ᓇᒦᑦᑐᓂ?

00:01:36

ᐃᖃᓪᓕᔪᖅ - ᖁᐃᔭᖅᑐᕐᕕᖕᒥᓃᑦᑐᓂ ᐃᒡᓘᖕᒪᑦ ᖁᐃᔭᖅᑐᕐᕕᒋᒻᒪᒍ ᑕᕝᕗᖓ ᖁᐃᔭᖅᑐᕐᕕᖕᒥᓄᑦ ᖁᐃᓕᖅᑐᖅ ᐅᐸᒃᑕᕋᓗᐊᕋ ᖃᐅᔨᓐᖏᑦᑐᓂᖓ ᓲᙯᒻᒪ ᑐᖁᖓᒐᓗᐊᕋᒪᓕ ᐅᓐᖏᖅᓴᖓᙯ ᐊᒃᑐᕈᒃᑯ ᐃᑎᕈᓐᓇᖅᐳᖓ ᐊᓱᐃᓛᒃ ᐊᒃᑐᕋᒃᑯ ᐃᑎᖅᑐᖓ ᖃᒧᖓ ᐃᒡᓕᐊᖓᓄᑦ ᓇᐅᒃᑯᑦ ᐃᑎᕆᐊᒃᓴᒃ ᖃᐅᔨᓐᖏᓚᖓ ᑕᒪᐅᓇ ᑭᓯᐊᓂ ᐅᓐᖏᖅᓴᖓ ᐊᑐᖅᑐᒍ ᐃᒡᓕᐊᖓᓄᐊᖅᑐᖓ ᑕᕝᕙ ᐃᑎᖅᑐᓂ ᖃᐅᓛᓯᓪᓗᒍ ᓯᓂᖃᑦᑕᓚᐅᖅᑐᑎᒃ ᖃᐅᔨᓕᕋᒪ ᐃᒫᒃ ᑕᔅᓯᒃᑲᒥᖓ ᐅᐃᓂ ᐅᖃᐅᑎᕚ ᐃᓐᓇᖓᒐᓗᐊᖅᑦᓱᑎᒃ: “ᐅᐃᖕ ` ᐋᓯᓐ ᑕᕝᕙ ᓯᙰᓕᑕᕋᓗᐊᖅᐳᖓ ᐃᓅᔾᔭᕐᒥᓇᓂᓘᖅᑐᓂᓗ” ᕿᐊᓕᖅᑐᓂᓗ.

00:02:24

ᑯᑉᓗ - ᖃᓄᐃᑦᑐᓂ ᕿᐊᓕᖅᐸ?

00:02:26

ᐃᖃᓪᓕᔪᖅ - ᑐᖁᓂᐊᕋᓱᒋᓪᓗᓂᖓ ᐅᑯᐊ ᐊᖓᔪᒃᑲ ᑕᓪᓕᒪᑦ ᑌᒪᓐᓇ ᐃᓅᓴᖅᑐᑎᒃ ᑐᖁᐃᓐᓇᕐᒪᑕ ᑐᖁᖃᑦᑕᕐᒪᑕ ᐊᒻᒪ ᒪᓕᒃᓴᕐᓗᖓ ᑐᖁᓂᐊᕋᓱᒋᓪᓗᓂᖓ ᓄᑕᕋᖅᑖᕈᒪᓗᐊᒧᑦ ᕿᐊᓕᖅᑐᓂ ᐅᖃᐅᑎᓪᓗᓂᐅᒃ ᐊᑖᑕᒪ; “ᐃᓅᑎᑕᐅᔪᓐᓇᕐᓂᐊᕐᑐᒃᓴᐅᕗᖅ” ᐊᓱᐃᓚ ᓯᙰᖑᕙᒃᑲᒪ ᒪᓐᓇ ᐃᒡᓕᐊᑉ ᐃᓗᐊᓃ ᐃᒡᓕᐊᖓᓃᑦᑐᖔ ᐊᓂᓵᓕᖃᑦᑕᕐᓗᓂᓗ ᐃᓱᒪᒋᒐᒃᑯ ᐊᓂᓵᓕᕙᒃᑐᓂ ᐅᓪᓛᒃᑯᑦ ᑐᐸᒃᑳᖓᒥ ᐃᒡᓗᓗ ᑕᐅᑐᒃᑐᒍ ᐃᒡᓕᐊᖓᓗ ᐃᒡᓘᓇᓱᒋᓪᓗᒍ ᐃᒡᓗᒦᑦᑐᖓᐅᒐᓗᐊᖅ…

00:03:09

ᑯᑉᓗ - ᐃᒡᓘᖂᔨᑦᑎᐊᖅᑐᓃ?

00:03:12

ᐃᖃᓪᓕᔪᖅ - ᐃᒡᓘᖅᑯᔨᑦᑎᐊᖅᑐᓂ ᓂᕈᑭᑦᑐᑯᓘᒐᒥ ᑕᕝᕙ ᐊᓱᐃᓛᒃ ᐸᖕᒥᐅᓕᖅᑐᐊᓘᓕᖅᑐᖓ ᕿᒻᒥᖅ ᐅᓇ ᐊᑕᐅᓯᖅ ᑲᑕᖕᒧᐊᖃᑦᑕᖅᑐᖅ ᖃᓂᖓ ᑐᑭᖓᓪᓗᓂ ᑲᑕᖕᒧᐊᕌᖓᑦ ᓱᓇᐅᕝᕙ ᑯᔭᓕᕌᖓᒍ ᓄᓕᐊᓂ ᐅᓇ ᐅᓱᐊ ᕿᒻᒥᐅᓇᓱᒋᔭᕋ ᐊᓂᒋᐊᕌᖓᒥ ᒥᕆᐊᖅᐸᒃᑐᓂ ᒥᕆᐊᖅᑕᖓᓂᒃ ᓂᕆᔪᒪᓪᓗᖓᐅᒐᓗᐊᖅ ᓂᕆᕙᖅᑰᓚᐅᖅᑐᖓ ᐊᖏᓕᖅᐸᓪᓕᐊᓚᐅᖅᑐᖓ…

00:03:40

ᑯᑉᓗ - ᑖᓐᓇ ᒥᕆᐊᖅᑕᖓ ᐊᖏᓪᓕᕙᓪᓕᐊᔾᔪᑎᒋᓪᓗᒎ?

00:03:43

ᐃᖃᓪᓕᔪᖅ - ᐄᖑᖅᑰᔨᔫᖅ ᑌᒪᓐᓇ ᐅᓱᖓ ᓱᓇᐅᕝᕙ ᕿᒻᒥᐅᓇᓱᒋᓪᓗᒍ ᑲᑕᖕᒧᐊᕋᓱᒋᖃᑦᑕᖅᑕᕋ ᐊᓱᐃᓚᒃ ᐸᖕᒥᐅᓕᖅᑐᐊᓘᒐᒪ ᑖᓐᓇ ᐃᒡᓗᑯᓗᒐ ᓂᕈᑭᑦᑐᒻᒪᕆᑯᓘᓕᕐᒪᑦ ᒪᓐᓇᓗ ᑰᒃᑐᐊᓘᓕᖅᑐᓂ ᐃᒡᓕᐊᖓ ᑰᒃᑐᐊᓘᓕᖅᑐᓂ ᑕᑲᓐᓇ ᑲᑕᒃ ᑕᑐᒃᑲᒃᑯ ᐊᓂᔪᒪᓪᓗᖓ ᐃᓱᒪᓕᕋᒪ ᐊᓱᐃᓚᒃ ᓄᖅᑲᖓᖏᓕᖅᑐᖓ ᐃᒡᓕᒦᑦᑎᐊᓚᐅᕋᓗᐊᖅᑐᖓ ᐃᒡᓕᑕᖃᕈᓐᓃᕐᒪᑦ ᑕᕝᕗᖓ ᓈᒻᒪᒋᑐᐃᓐᓇᓕᕋᒃᑯ ᐃᒡᓗᑯᓗᒃ ᑲᑕᒃ ᑕᑲᓐᓇ ᑎᑭᖅᑲᖏᐊᕐᔪᒃᑲᒃᑯ ᐊᖑᑎᓯᐅᑎᓐ` ᐅᑯᐊ ᑲᑕᐅᑉ ᑕᔅᓱᒪ ᓴᐅᒥᑦᑎᐊᖓᓃᑦᑐᑦ ᐃᓴᒃᑐᒍ ᑕᕝᕙ ᑎᒍᓪᓗᒍ ᑕᕝᕙ ᐃᒃᑮᖃᑦᑕᓛᒥ ᐃᒃᑮᖑᐊᖃᑦᑕᕐᓂᐊᕆᓪᓗᓂ ᑖᒃᑯᐊ ᐊᑐᕐᓗᒋᑦ ᐃᓕᓪᓗᒋᑦ ᐊᕐᓇᖅ ᑖᒃᑯᐊ ᖁᓪᓕᑯᓗᓪᓗ ᐅᓗᑯᓗᓪᓗ ᑎᒍᒐᒃᑭᑦ ᐊᓂᒋᐊᕈᐊᓘᒐᒪ…

00:04:43

ᑯᑉᓗ - ᐊᕐᓇᐅᔪᒪᖔᓕᕋᕕᑦ ᑖᒃᑯᐊ ᐊᕐᓇᖅᓯᐅᑎᑦ ᑎᒍᓪᓗᒌᑦ?

00:04:46

ᐃᖃᓪᓕᔪᖅ - ᐄᐃ ᓲᙯᒻᒪ ᓴᕝᕕᐅᖅᑕᓕᒃ ᐊᑎᕋ ᐊᕐᓇᐅᔪᒪᓚᐅᕐᓂᕐᒪᑦ ᐊᓂᓪᓗᖓ ᐊᓂᓪᓗᖓ ᐃᓛ ᐊᓂᒐᒪ ᐅᐃᑦᓴᕋᓗᐊᕋᒪ ᐳᔫᖅᑐᐊᓗᒃ ᓱᐴᖅᑑᑎᑦ ᒪᑯᐊ ᓱᐴᖅᑑᑎᑦ ᐳᔪᖃᖅᐸᖕᒪᑕ ᑌᒪᓐᓇ ᐊᖏᓂᖅᓵᓗᖕᒥᒃ ᐳᔫᖅᑐᐊᓗᒃ…

00:05:06

ᑯᑉᓗ - ᖃᓐᓄᐃᓐᓇᒥ ᐳᔫᖅᑐᐊᓗᒃ?

00:05:07

ᐃᖃᓪᓕᔪᖅ - ᐊᓂᓵᕋᒪ ᐅᕙᖓ ᐳᔪᐊᓗᖓᓂᒃ ᐆᒥᖓ ᐃᕐᓂᐊᖑᓂᕐᒥᒃ ᐊᓱᐃᓛᒃ…

00:05:15

ᑯᑉᓗ - ᑕᒪᓐᓇ ᑕᐅᑐᒃᑕᑐᐊᕆᓪᓗᒎ?

00:05:16

ᐃᖃᓪᓕᔪᖅ - ᐄᐃ ᐊᓱᐃᓛᒃ ᑕᑯᑦᑎᐊᕋᒪ ᐳᔫᕈᓐᓃᖅᑐᓂ ᐃᓛᒃ ᖁᖓᓐᓇᒪ ᐊᐅᓚᓪᓗᓂ ᐊᓈᓇᒐᓗ ᖁᖓᓐᓇᒃᑯ ᖃᓂᖓ ᐊᐅᓚᒋᓪᓗᓂ ᐊᒻᒪ ᑕᒃᑭᒃᑯᐊᒃ ᐹᒦᑦᑐᒃ ᕿᓚᔪᒃ ᓱᓇᐅᕝᕙ ᕿᓚᔪᒃ ᕿᕕᐊᕋᒃᑭᒃ ᖁᖓᑲᓗᐊᕋᒃᑭᒃ ᐊᒻᒪ ᐅᖃᓪᓚᒃᑐᒃᓴᐅᒐᓗᐊᖅᑐᓂ ᖃᓂᖓ ᐊᐅᓚᓪᓗᓂ ᐃᓗᐊᓃᑦᑐᖓᓕ ᑐᓵᑦᑎᐊᓚᐅᖅᑐᖓ ᐊᓂᒐᒪᓕ ᑐᓵᔪᓐᓃᖅᑐᖓ ᐃᕐᓂᐊᖑᒐᒪ…

00:05:46

ᑯᑉᓗ - ᖃᓄᐃᓐᓇᒥᒃ ᑌᒃᑯᐊ ᕿᓚᕙᑦ?

00:05:48

ᐃᖃᓪᓕᔪᖅ - ᐃᕐᓂᐊᖑᓵᓕᖁᓂᑯᒧᑦ ᐅᕙᖓ - ᕿᐄᐄᐄ… ᐊᑯᓂ ᐃᕐᓂᐊᖑᖏᓕᕐᓂᕋᒪ ᓴᒃᑯᓂᒡᓗ ᓴᕕᖕᒥᒡᓗ ᐅᓈᕐᒥᒃ ᑎᒍᓯᓇᓱᖃᑦᑕᕐᓂᕋ ᑖᓐᓇ ᐊᑯᓂᐅᔾᔪᑎᒋᓐᓂᕋᒃᑯ ᑕᕝᕙ ᐃᕐᓂᕕᖕᒥ ᐃᕐᓂᕕᖓᓄᐊᖅᑐᖔ ᐃᕐᓂᕕᖓ ᑖᓐᓇ ᑕᑯᑦᑎᐊᖅᑐᒍ ᑕᕝᕙ ᐃᒃᑮᖅᑐᐊᓗᒐᒪ ᐃᒥᕐᓚᖔᕋᓗᐊᖅᑐᖓ ᐅᖔ ᐅᖔ ᐅᖔ ᐅᖔᓚᓯᔪᐊᓘᒐᒪ ᖁᒻᒥᐅᑎᓪᓗᖓ ᐊᓈᓇᒪ ᑕᔅᓱᒪᓕ ᐅᕕᓘᑉ ᓴᓗᒪᖅᓴᓚᐅᖅᑐᓂᖓ ᑕᕝᕗᖓᖅᑖᖓ ᐊᓈᓇᓐᓄᐊᖅᑖᖓ ᒪᓐᓇᓗ ᒥᒃᑎᐊᕈᓗᒐ ᑭᐱᓪᓗᓂᐅᒃ ᐅᕕᓘᑉ ᐊᓈᓇᓐᓄᐊᖅᑖᖓ ᑕᕝᕙ ᑕᕝᕙᓃᓚᐅᐱᓚᒃᑐᓄᒃ ᑭᓂᕐᕕᒋᓂᐊᖅᑕᖓᒎᖅ ᑕᒃᑭᑲᐅᖕᒪᑦ ᑕᒃᑯᖓ ᐃᒪᓐᓇᓕ ᑐᐱᓪᓚᑦᑖᑯᓗᖕᒧᑦ ᓂᕈᑐᓂᖅᓴᐅᔪᒧᑦ ᖁᓪᓕᖃᑦᑎᐊᖅᑐᓂᓗ ᐊᓱᐃᓛ ᑕᕝᕗᖓᕋᒥ ᐅᔪᓕᐅᓕᖅᑐᓂ...

00:06:57

ᑯᑉᓗ - ᑌᓐᓇᓕ ᐃᕐᓂᕕᒃ ᑐᐱᑐᐃᓐᓇᑯᓗᓘᓪᓗᓃ?

00:07:00

ᐃᖃᓪᓕᔪᖅ - ᐃᒃᓯᓐᓇᖅᑕᐅᓪᓗᓂᓖ ᑖᓐᓇᓗ ᐊᕐᕌᕋ ᐊᕐᕌᕈᓗᖃᖅᐸᖕᒪᑕ ᓄᑕᕋᓛᑦ ᐅᓇᓗ ᐊᓪᓕᕋᕆᔭᖓ ᑖᓐᓇᓗ ᑐᐱᑯᓗᒃ ᐊᓂᑕᐅᓪᓗᑎᒡᓕ ᑕᕝᕙ ᐅᔪᓕᐅᕐᒪᑦ ᑖᔅᓱᒪ ᐱᒪᔨᒋᔭᒪ ᐅᕕᓘᑉ ᐱᒪᔨᒋᔭᓐᓄᒃ ᐆᒃᑎᒪᒍ ᐅᔪᓕᐅᖅᑐᓂ ᐅᔪᖅᑐᓯᒋᐊᕐᒪᑦ ᑕᕝᕙ ᑳᒃᑐᐊᓘᓪᓗᖓ ᐃᒥᕋᓗᐊᖅᑐᖓ ᐃᒥᖃᑦᑕᓕᕋᓗᐊᖅᑐᖓ ᐊᓈᓇᓐᓂᑦ ᓂᕿᑯᓗᖕᒥᒃ ᐲᖅᓯᒐᒥ ᒥᑭᑦᑐᒻᒪᕆᑯᓗᖕᒥᒃ ᐊᒫᕋᒥᖓ ᑕᒧᐊᓕᑦᑐᓂᖓ ᐊᒻᒣᓛᒃ ᓂᕆᓚᐅᖅᑐᓂ ᓂᕆᐊᓂᒃᑲᒥ ᖃᔪᕐᒥᒃ ᖃᓗᓯᒐᒥ ᓂᐅᖅᓯ ᖃᔪᖅᑐᖅᑐᖓ ᓱᓇᐅᕝᕙ ᐃᒪᓐᓇ ᖃᓂᕋ ᐊᒃᑐᑐᐃᓐᓇᖅᑐᓂᐅᒃ ᑕᒧᐊᓕᑕᐅᓇᓱᒋᔪᖓ ᓂᕆᓇᓱᒋᔪᖓ ᐊᒻᒪᓘᓇ ᖃᔪᕐᒥᒃ ᖃᓂᕋ ᑯᓯᕐᕕᒋᐊᕐᔪᖕᒪᒍ ᐊᕿᐊᑦᑐᕋᓱᒋᔪᖓ ᑕᕝᕙ…

00:08:05

ᑯᑉᓗ - ᑖᒃᑯᐊᓕ ᓄᕿᑯᓗᐃᑦ ᑕᒧᐊᑎᐊᓂᒃᑲᒥᒋᑦ ᐃᓪᓕᖕᓄᑦ ᖃᓄᐃᑦᑐᓂᒋᑦ?

00:08:09

ᐃᖃᓪᓕᔪᖅ - ᐴᖅᑐᓂᒋᑦ ᑭᓱᒧᒡᒍᖔ ᑌᒪᓐᓀᑦᑐᑯᓗᖕᒧᑦ ᐃᓂᑯᓗᐊᓄᑦ…

00:08:15

ᑯᑉᓗ - ᐃᓂᑯᓗᖃᖅᐸᒃᑐᑏᒃ?

00:08:18

ᐃᖃᓪᓕᔪᖅ - ᐄᐃ ᐃᓂᑯᓗᖃᕐᒪᑕ ᐃᓛ ᐃᓂᑯᓗᐊ ᑌᓐᓇ ᐊᑎᖓ ᐳᐃᒍᕋᒃᑯ ᖁᔭᓇ ᐳᐃᒍᕐᓗᒍ ᑌᓐᓇ ᑕᐅᑐᖅᑰᑦᑎᐊᕋᓗᐊᖅᑐᒍ ᑕᕝᕙᓕ ᓂᕆᐊᓂᒃᑎᓪᓗᒍ ᐊᕿᐊᑦᑐᕋᒪ ᓯᓂᓕᖅᑐᐊᓘᓪᓗᖓ ᓱᓇᐅᕝᕙ ᑐᖁᓕᖅᑐᖓ…

00:08:38

ᑯᑉᓗ - ᓯᓂᖅᑰᔨᕕᑦ ᑐᖁᓪᓗᑏᑦ?

00:08:43

ᐃᖃᓪᓕᔪᖅ - ᐄᐃ ᐊᑖᑕᒐ ᑕᕝᕙ ᑐᖅᑐᓚᓪᓗᓂᐅ ` ᙯ ᓴᑲᖕᒪᒡᒎᖅ ᓴᕕᐅᖅᑕᓕᒃ ᐆᒪᖁᓪᓗᓂᖓ ` ᐃᓛ ᓴᕝᕕᐅᖅᑕᓕᒡᓗ ᖃᐅᔨᑦᑎᐊᓕᕆᓪᓗᒍ ᑕᕝᕙ ᓇᔭᓐᓈᓃᓐᓇᒪ ᐃᓅᓂᐊᓕᖅᑐᖓ ᐊᓱᐃᓛ ᐊᒻᒪ ᑕᕝᕙ ᑭᖑᕐᖓᒍᑦ ᖃᓄᐃᓕᕋᒪᑭᐊᖅ ᐊᒻᒪ ᓯᓂᓕᖅᑐᐊᓘᖕᒥᒐᒪ ᓯᓂᓕᖅᑐᖓ ᐅᐃᕐᖓᖅᑐᐊᓘᓕᕋᒪ ᐊᒻᒣᓚᒃ ᑐᐸᑦᑎᐊᑕᕆᕗᖓ ᐊᕐᓇᖅᑖᖅ ᐅᖃᓪᓚᒃᑐᖅ: “ᐅᕙᖓ ` ᐅᓇ ᐊᕐᓇᖅᑖᖅ ᑐᓴᖑᖅᑖᓗᒋᒐᒃᑯ ᐃᖃᓪᓕᔫᖅᑕᐅᖃᑦᑕᕐᓗᓂ ᐊᑎᕐᓚᐅᕐᓚᒍ ᐊᑦᑎᖅᑕᐅᓚᐅᕐᓚᖓ ᑮᒍᑎᒋᓂᐊᕋᒃᑯ ᑮᒍᑎᒋᓂᐊᕐᒪᖓ”…

00:09:29

ᑯᑉᓗ - ᓲᕐᓗ ᑮᒡᓗᓂᑏᑦ?

00:09:31

ᐃᖃᓪᓕᔪᖅ - ᐃᒫᒃ ᑮᒡᓗᓂᖓ ᖃᓄᑭᐊᖅ ᐃᓐᓇ ᑮᒍᑎᖃᕈᒪᕙ ᐃᒫᒃ ᐃᓅᓯᖃᖁᓪᓗᓂᖓ… ᐃᒫᒃ ᓂᖏᐅᕌᓘᒐᒥ ᐃᓅᓯᖅᐳᒃ ᓲᕐᓗ ᐊᑦᑕᑦᑕᖅᑐᓂ ᑮᒃᑐᓂ ᑌᑯᖓ ᐃᓅᑐᖃᐅᔭᕐᓂᐊᓕᕋᒪ ᑕᕝᕙ ᑭᓂᕈᓐᓃᖅᑐᓂ ᐃᓛ ᐃᓅᑦᑎᐊᓕᖅᑐᖓ ᐅᑯᐊ ᑕᑯᕙᒃᑐᒋᑦ ᐃᓯᖅᑐᑦ ᐊᑖᑕᒃᑯᒃᑲ ᖃᐅᔨᒪᑦᑎᐊᓕᖅᑐᒋᑦ ᑖᓐᓇᓘᓐᓃᑦ ᐅᕕᓗᖅ ᐃᓕᑕᕆᐅᒪᑦᑎᐊᖏᓐᓇᖅᑐᒍ ᖃᐅᔨᒪᑦᑎᐊᖏᓐᓇᖅᑐᒍ ᑐᐱᕐᒧᐊᖅᑐᓄᒃ ᐊᑖᑕᒪ ᑐᐱᖓᓄᑦ ᑐᑎᖃᑦᑕᓕᖅᑐᑎᒃ ᐊᑖᑕᒃᑯᒃᑲᒃ ᑕᕝᕙ ᒥᖑᑦᑎᓐᓈᓕᐅᕐᓂᐊᓕᖅᑐᓂᖓ ᓱᓇᐅᕝᕙ ᐊᕐᓇᑐᑦ…

00:10:23

ᑯᑉᓗ - ᓄᑕᕋᑯᓘᓪᓗᑏᑦ?

00:10:24

ᐃᖃᓪᓕᔪᖅ - ᐋᒃᑲ ᐃᓐᓈᕋᐅᓕᖅᑐᖓᓕ ᐊᐅᓈᕆᐅᕐᓂᐅᓕᖅᑐᖓ ᐃᓛ ᓯᐱᓂᑰᓐᓂᕋᒪ ᓴᕝᕕᐅᖅᑕᓕᒃ ᐊᖑᑕᐅᔪᒪᓚᐅᕐᓂᖏᒻᒪᑦ ᐊᕐᓇᐅᔪᒪᓕᓚᐅᕐᓂᕐᒪᑦ ᐊᖑᓇᓱᖃᑦᑕᓐᖑᕐᓂᕋᒥ ᐃᓛ ᐊᖑᓇᓱᒃᑐᓂ ᐊᒃᓱᕈᓗᐊᕐᓂᕋᒥ ᐃᒃᑮᖃᑦᑕᓐᖑᕐᓂᕋᒥ ᐊᕐᓇᐅᓕᓚᐅᕋᒪ ᓯᐱᓪᓗᖓ ᐅᓱᖃᓚᐅᕋᓗᐊᖅᑐᖓ ᐅᑦᑐᒃᑖᕐᓂᖅᑐᖓ ᑌᒪᓐᓇ ᓯᐱᓲᖑᓐᓂᕐᒪᑕ…

00:10:51

ᑯᑉᓗ - ᐊᖑᑕᐅᓚᐅᕋᓗᐊᖅᑐᑎᒃ ᐊᕐᓇᓐᖑᖅᑐᑎᒃ?

00:10:54

ᐃᖃᓪᓕᔪᖅ - ᐄᐃ ᐅᓱᖃᓚᐅᕋᓗᐊᖅᑐᑎᒃ ᐅᑦᑐᒃᑖᕌᖓᒥᒃ ᓯᐱᓲᖑᖕᒪᑕ ᑌᒪᓐᓇ ᐊᖑᑕᐅᓚᐅᕋᓗᐊᖅᑐᖓ ᐊᕐᓇᓐᖑᕐᓂᕋᒪ…

00:11:02

ᑯᑉᓗ - ᐊᖑᑎᓯᐅᑎᓂᒃ ᐊᓐᓄᕌᖃᖅᑐᑏᑦ?

00:11:04

ᐃᖃᓪᓕᔪᖅ - ᐄᐃ ᐊᖑᑎᓯᐅᑎᓂᒃ ᐊᓐᓄᕌᙯᓐᓇᑦᑎᐊᖅᑐᖓ ᐊᐅᓈᕆᐅᕐᓂᓗᒃᑖᓄᑦ ᐃᓚᐅᖃᑦᑕᓚᐅᕋᒪ ᐊᑖᑕᑯᓗᓐᓂ ᐊᑖᑕᒐᓕ ᐅᑭᐊᑐᐃᓐᓇᖅᑎᓪᓗᒍ ᐅᐱᕐᖔᒃᑯᑦ ᔫᓐᒥ ᐃᓅᓚᐅᖅᑐᖓ ᐅᑭᐊᑐᐃᓐᓇᖅᑎᓪᓗᒍ ᑐᖁᓚᐅᕐᒪᑦ ᐊᑖᑕᓪᓚᑦᑖᕋ ᐃᒫᖅᑐᓂ ᑕᕝᕙ ᑌᒪᓐᖓᑦ ᐊᖑᑎᓯᐅᑎᓂᒃ ᐊᓐᓄᕌᙯᓐᓇᖅᑐᖓ ᐊᒡᓛᑦ ᐊᖑᑕᐅᓇᓱᒌᓐᓇᖅᑐᖓ ᐊᕐᓇᐅᓇᓱᒋᓐᖏᑦᑐᖓ ᐊᓱᐃᓚ ᐃᓐᓇᐅᓕᓕᕋᒪ ᐊᐅᓈᕆᐅᕋᒪ ᐊᓈᓇᒪ ᒥᖑᑦᑎᓐᓈᖅᑐᒥᒃ ᐊᑎᒋᓕᐅᓕᖅᑐᓂᖓ ᖃᕐᓕᓕᐅᕐᓂᐊᖅᑐᓂᖓᓗ ᐊᑎᒋᓕᐅᕐᓕᕋᒥᖓ ᐊᓱᐃᓚ ᕿᐊᓕᖅᑐᓂ ᐊᑖᑕᓂ ᐊᑖᑕᒋᓇᓱᒋᓪᓗᓂᖓ ᐃᓛ ᐊᑦᑎᐊᕆᒧᑦ ᑌᒪᓐᓇ ᐊᓐᓄᕋᔾᔨᐅᕈᒪᓐᖏᒃᑲᓗᐊᖅᑐᓂᐅᒃ ᐊᑖᑕᓂ ᐊᑖᑕᒋᒐᒥᖓ ᕿᐊᓕᖅᑐᓂ ᑕᕝᕙ ᐊᕐᓇᓐᖑᖅᑐᖓ ᑭᓯᐊᓂ ᐊᐅᓈᕆᐅᕋᒪ ᐊᕐᓇᐅᓇᓱᒋᓐᖐᓐᓇᖅᑐᖓ ᓱᓕ ᑌᒪ ᓇᓗᓕᖅᐸᕋ ᓇᓗᓕᓐᖏᒃᑲᓗᐊᖅᑐᒍ ᑖᓐᓇ…

00:12:19

ᑯᑉᓗ - ᒫᓐᓇᒧᑦ ᑎᑭᑦᑐᒎ?

00:12:21

ᐃᖃᓪᓕᔪᖅ - ᐄᐃ ᒫᓐᓇᒧᑦ.

ᖃᐅᔨᒋᐊᕐᕕᓴᖅ

ᑐᑭᒧᐊᕐᑎᓯᔨᐅᑉ

1. ᑐᑭᒧᐊᕐᑎᓯᔨᐅᑉ ᐅᖄᔭᖏᑦ [PDF 294.71kB]

ᐊᓪᓚᓯᒪᔪᑦ ᐅᖃᓕᓚᒫᕋᓱᐊᕐᓗᒋᑦ ᖃᕋᑕᐅᔭᒃᑯᑦ ᐱᑕᖃᕆᐊᓕᒃ Adobe Acrobat Reader